Visit Armenia

Ինչպե՞ս կարող ենք օգնել Ձեզ

Galleries

Հայաստանի ազգային պատկերասրահ

Ազգային պատկերասրահը գտնվում է Երևանի Հանրապետության հրապարակում: Հիմնվել է 1921թ., սակայն սև տուֆից կառուցված նախկին երկհարկանի շենքը երեսպատվել է ճերմակ քարով, իսկ բակում 1978թ. բարձրացել է ութհարկանի մասնաշենքը: Պատկերասրահում հավաքված է հայկական, ռուսաստանյան և արևմտաեվրոպական կերպարվեստի հարուստ հավաքածու (ավելի քան 25 հազար ցուցանմուշ):

Պատկերասրահն անդամակցում է Կերպարվեստի թանգարանների համաշխարհային ընկերակցությանը: 

«Ակադեմիա» պատկերասրահ

Պատկերասրահը գործում է 2001թ.-ից։ Պարբերաբար կազմակերպվում են ժամանակակից և դասական արվեստի գործերի ցուցահանդես-վաճառքներ։ Ցուցադրությունները փոխվում են յուրաքանչյուր ամիս։ Գեղանկարներից զատ ցուցադրվում են նաև դեկորատիվ արվեստի նմուշներ։

«ՆՓԱԿ» Նորարար փորձառական արվեստի կենտրոն

Մշակութային կենտրոնը գործում է 1992թ.-ից։ Կազմակերպում է ցուցահանդեսներ, կինոդիտումներ, թատերական ներկայացումներ, ինչպես նաև` ժամանակակից արվեստի վերաբերյալ գործնական պարապմունքներ, քննարկումներ։

Արամե պատկերասրահ

Պատկերասրահը գործում է 2003 թվականից: Կազմակերպվում են հայ նկարիչների ստեղծագործությունների ցուցահանդես-վաճառքներ։ Համագործակցում է սփյուռքահայ նկարիչներ Էմիլ Գազազի և Ժանսեմի, ինչպես նաև տեղաբնակ քսանից ավելի նկարիչների հետ։ Այստեղ կարելի է ձեռք բերել հայ դասական արվեստի այնպիսի նշանավոր հեղինակների գործեր, ինչպիսիք են Մինաս Ավետիսյանը, Հովսեփ Կարալյանը, Մհեր Աբեղյանը, Բաբկեն Քոլոզյանը, Վաղարշակ Էլիբեկյանը և ուրիշներ։ Վաճառված ստեղծագործությունների հետ տրվում են նաև դրանց իսկությունը հաստատող վկայագրեր, իսկ անհրաժեշտության դեպքում` արտասահմանյան արտոնագրեր։

«ՀայԱրտ» մշակութային կենտրոն

Հիմնադրվել է 1996-1998 թթ.։ Կազմակերպվում են ցուցադրություններ, անցկացվում բարեգործական միջոցառումներ, հանդիպումներ նշանավոր մարդկանց հետ, ցուցադրվում են ֆիլմեր, նորաձևության հավաքածուներ և այլն։

Կենտրոնին կից կա ձեռարվեստի մանկական ստուդիա։

«Նարեկացի» արվեստի միություն

Կենտրոնը գործում է 2005թ.-ից. ներառում է ցուցասրահ, դահլիճ, ձայնագրման ստուդիա։ Միաժամանակ կազմակերպվում են անհատական ցուցադրություններ, համերգներ, գեղարվեստական և փաստավավերագրական ֆիլմերի ցուցադրություններ: Կենտրոնն ունի կամերային երաժշտական ընկերություն, ժողովրդական գործիքների ստուդիա։ Կան հարմարություններ հաշմանդամների համար` հարթակներ, վերելակ, սանհանգույց։

«Վալմար» արվեստի սրահ

2004 թվականից պատկերասրահը կազմակերպում է Վալմարի և նրա դուստր Հռիփսիմե Մարգարյանի ստեղծագործությունների ցուցահանդես-վաճառք։ Նկարիչը բուռն ստեղծագործական գործունեության ընթացքում ունեցել է անհատական 37 և խմբային 117 ցուցահանդես` կազմակերպված ոչ միայն Հայաստանում, այլև Եվրոպայի, Միջին Արևելքի և ԱՄՆ-ի մշակութային կենտրոններում։ Վալմարի և Հռիփսիմեի աշխատանքները ներկայացված են նաև Երևանի ազգային, Մոսկվայի Տրետյակովյան պատկերասրահներում, Դեթրոյթում և այլն։ «Վալմար» պատկերասրահն ունի մշտական ցուցահանդես Նյու Յորքում, պարբերաբար ցուցահանդեսներ են կազմակերպվում նաև աշխարհի 40 երկրներում։

«Ալբերտ և Թովե Բոյաջյան»

Պատկերասրահը գործում է 2001 թվականից, ունի երկու դահլիճ, որոնցում ցուցադրվում են Աշոտ Հովհաննիսյանի, Անատոլի Գրիգորյանի, Տիգրան Մատուլյանի, Արամ Իսաբեկյանի, Գարեգին Դավթյանի, Էդվարդ Վարդանյանի, Սարգիս Համալբաշյանի, Էդուարդ Իսաբեկյանի և այլոց ստեղծագործությունները։ Պատկերասրահի հիմնական նպատակը երիտասարդ արվեստագետներին աջակցելը և նրանց անհատական ցուցահանդեսները կազմակերպելն է։

«Էդուարդ Իսաբեկյան» ցուցասրահ

«Հայ Արտ» մշակութային կենտրոնում 2013թ. մայիսի 3-ին բացվեց «Էդուարդ Իսաբեկյան» ցուցասրահը: Ցուցասրահի հիմքը դրվել էր դեռեւս 2004թ.-ին՝ երջանկահիշատակ վարչապետ Անդրանիկ Մարգարյանի հանձնարարությամբ: Ցուցասրահի բացման պատիվը վերապահվել էր հենց վարչապետի եւ գեղանկարչի որդիներին՝ Տարոն Մարգարյանին ու Արամ Իսաբեկյանին: Գեղարվեստի ակադեմիայի և մշակութային ու նաև այլ ուսումնական հաստատությունների ուսանողների համար այն ծառայում է նաև որպես ուսուցողական կենտրոն: